Boles lea dutkamin Ohcejoga Buođđobogi botni goaivuma sihke čáhcelága rihkkumin ja birrasa bilideapmin.

Diibmá Lappi EBI-guovddáš dagai dutkanbivdaga joga botni lobihis goaivumis Ohcejoga Buođđobogis. Dál EBI-guovddáš lea addán visot materiálaid bolesii ja vuordá dutkamušaid bohtosiid.

Dutkanhoavda Esa Harju muitala, ahte álgoálggus rihkusalmmuhus lei merkejuvvon čáhcelága rihkkumuššan, muhto dál ášši dutket maiddái birrasa bilideapmin. Boles figgá dutkamis čielggadit, dagahago dahku Buođđobohkái dakkár vahága, man sáhttá buohtastahttit birrasa bilideapmái.

– Go sáhka lea dakkár dagus, de mii dárbbašit dasa áššedovdiid cealkámušaid ja veahki, muitala Esa Harju.

Čáhcelága rihkkumis eanemusráŋggáštus lea olu unnit go birrasa bilideamis, čilge Harju.

– Juos maŋŋelabbos alaguoddi áššáskuhttá dahje duopmostuollu dubme birrasa bilideamis, de dat váikkuha ráŋggáštusa sturrodahkii.

Harju muitala, ahte ášši ovdána dan láhkai, ahte vuos boles čielggada, mii lea dat doaibmi, guhte sáhttá addit cealkámuša áššái. Harju mielde áššiin barget obba áigge ja son jáhkká ášši gárvánit čuovvovaš mánotbajiid áigge.

Áššeosolaččaid eai leat vel gažadan, muitala dutkanhoavda Esa Harju.

Yle Ođđasiid Sámis ja Beaivvi ságaid sáhtát maid guldalit Yle Areenas.