Ohcejogas leamaš dán vahkus vejolaš oahppat lávostallama. Norgga sámedikki lahttu ja servodatberošteaddji Beaska Niillas lei boahtán KulturSápmái čájehit ja muitalit makkár vierut lávostallamis leat.

Lávu uksa lea čadnojuvvon gitta, amas biegga dan doalvut, muhto dan lávejit čatnat nubbe bealde gitta.

Dalán go lávvui lea čákŋaleame boahtá vuosttaš ášši, man galgá diehtit: Goappá beallái lávvouvssa rahpá.

– Dat lea dálki mii dan mearrida, guđe guvlui rahpá dan uvssa.

Beaska muitala, ahte lávu uvssa ja árrana gaskkas lea uskin, mii lea dego lávu feaskkir. Dasa bidjet bearbmehiid nappo guokte muora goappaš beallái árrana rádjai.

– Mun lean oahppan, ahte galget gávcci árageađggi, muitala Beaska.

Lávostallamis leat olu čálekeahtes njuolggadusat. Beaskka mielas lea dehálaš oahpahit dan ahte lávus boaššu, nappo uskki vuostebealde lávus leahki sadji árrana bálddas, lea bassi.

– Boaššu dat lea bassi báikki, dasa ii galgga mannat duolbmat dahje čohkkát dahje lávkut badjel.

Beaska lohká, ahte don doloža rájes lea boaššu leamaš bassi báiki ja maiddái ára ja uski.

– Dat galgá albmalahkái lávus láhttet, Beaska lohká.