Oahpaheaddji ja giellajorgaleaddji, dálá ealáhatolmmoš Veikko Holmberg ovttas bártniinis Niillasiin leaba almmustahttán Ohcejoga kulturdoaluid oktavuođas ođđa girjji Ellos Sápmi – ČSV-sápmelačča muittašeamit.

Veikko Holmberg lea eallán daid áiggiid go sámelihkadus álggii 1970–80-loguin. Dalle šattai oahpisin maid bustavaráidu ČSV, ”čájet sámi vuoiŋŋa”, ja dat dihtto ain otná beaivvige. Dát lea okta ášši maid son muittaša maŋŋebargga almmustahttojuvvon girjjistis.

– Olbmuin lei mokta ja eanemus nuorra olbmot ledje das mielde, muhto muhtin boarán maid. Gii lea álggos hutkkan dan čsv, dat lei doppe Sirpmás go sámi girječállit dolle čoahkkima doppe, -72 oron muitimin dat leai. Dat golbma bustáva dego symbolan, sámelihkadusa symbolan, muitala son.

Bárdni Niillas Holmberg lea čuovvolan áhčis bálgáid. Son lea šaddan dovddusin ii dušše dáidaga dihte, muhto maiddái das, ahte lea viššalit bargan sámeáššiid ovdii. Dál son lea beassan doaibmat áhčis girjegoasttideaddjin.

– Mun lean hui ilus das, ahte áhčči lea ožžon vejolašvuođa justa dáid dáhpáhusaid oktavuođas almmuhit girjji.