Lappi boleslágádus lea fas bidjan johtui boazobolesdoaimma cuoŋománu álggu rájes. Ođđa boazoboles lea dál čiekŋudeame boazodollui, muitala rihkuskomissára Esa Harju.

Boazobolesa bargun lea earret eará dutkat navdojuvvon boazosuoládemiid ja eará boazodollui laktáseaddji rihkkosiid. Boazoboles bargá dárbbu mielde miehtá Lappi, ja sus lea ovttasbargu eará boazodoalu eiseválddiiguin.

Bálgosiid ovttastusas leat ilus, go dákkár bolesvirgi lea fas ealáhusa veahkkin. Sii sávvet boazobolesa bargat buot áššiiguin, mat laktásit bohccuide ja boazodollui.

– Boazodoallu lea dakkár suorgi, masa dárbbašuvvo sierra máhttu. Dábálaš bolesii, guhte ii dieđe maidege boazodoalus, sáhttá leat váttis dahje juobe veadjemeahttun čielggadit áššiid. Lea buorre, ahte dál oažžut dasa olbmo, guhte vuodju boazodoalu áššiide, dadjá Bálgosiid ovttastusa doaimmajođiheaddji Anne Ollila.

Maiddái boleslágádusas illudit das, ahte ođđa boazoboles lea álggahan barggus.

– Dat lea mu mielas buorre, ahte leat ožžon dakkár olbmo, guhte joatká dáiguin áššiiguin ja vuodju boazodollui, dadjá Harju.

Lappi boleslágádusas lea maŋimus boazoboles leamašan jahkemolsašumis, muitala Harju.

Beaivvi ságaid ja Yle Ođđasiid Sámis sáhtát maid guldalit Yle Areenas.