Kárášjogas beassá dán gease návddašit gáhtadáidagis, dahjege gilidáidagis, nugo ieža gohčodit.
Else Marie Isaksen lea okta guđa Kárášjoga dáiddaskuvlla oahppis, geat leat vahku málen gilidáidaga Kárášjoga guovddážii.
Eará gilidáiddariid namat muitaluvvojit easka vuossárgga.
Gilidáidda, ii Street Art
Else Marie Isaksen čilge, ahte gilážis ii sáhta hállat Street Artis, gáhtadáidagis.
– Eai leat nu olu gáhtat dáppe nu go gávpogiin. Dáppe leat eanaš meahccegeainnut, bálgát ja luondu. Veadjá leat álkkit fuomášuvvot dađistaga go guhkit áigge cirgguha málanjuohtamin dahje "tágge". Nuppit dovdet nuppiid...muhtun diehtá juogá..., muitala Luhkkár Jovn’ Issát Else Márjá, Else Marie Isaksen Kárášjogas.
Isaksen leamašan maŋimuš jagi oahppi Kárášjoga dáiddaskuvllas.
Dáiddaskuvlla gilidáidda kursaoahpaheaddjin lea mannan giđa leamaš Anders Sunna, Giron.
– Gilidáidda mearkkaša ahte jearrá nuppis dahje ásahusas lobi oažžut. Dahje lea diŋgojuvvon dáiddanjuohtan cirgguheami bokte, muitala Isaksen.
Gilidáidda almmustahttojuvvo vuossárgga
Guđa dáiddara gilidáidda ja tekstildáidda almmustahttojuvvojit Kárášogas guovddážis odne vuossárgga 4.7.2016.
Dilálašvuohta lea Beassi-kulturstašuvnnas diibmu 14–15 Norgga áiggi ja govat leat Beasi lassin Bivdu-olgobáikkis.
Prográmmas leat sáhkavuorut, dearvvahusat, musihkka ja dáiddariid deaivvadeapmi.
Gilidáidda máttarádjás
Else Marie Isaksen gilidáidaga motiivan leaba Kárášjoga vuosttaš sátnejođiheaddji Luhkkár Ieš ja vuosttaš nissonsátnejođiheaddji Anne Toril E Balto.
– Na, moson máttaráddján, Luhkkár Ieš, fearada go son hávddistis go fuomáša ahte lean su portreahta atnán motiivan iežan áibbas vuosttaš gilidáiddageahččaleapmái ruovttugilistis. Mathis Isaksen lei Kárášjoga vuosttaš sátnejođiheaddjin (1867–93), muitala Isaksen.
– Naba veadjágo Uhca Ánne Ieš, Anne Toril Eriksen Balto, liikot dása. Jáhkkimis ilosmuvvat dasa go mun dán láhkai muittuhan máilmmi ahte aiddo son gárttai Kárášjoga vuosttaš nissonolmmošsátnejođiheaddjin (2011–15). Jurddaš, dat dáhpáhuvai olles 145 jagi maŋŋil go Kárášjohka luvvii iežas Goahgietti gelddas ja šattai iehčanassan 1866:s!, Isaksen smiehtada.
Oassi Geassesajit-festivála, mii lágiduvvo vuosttas háve
Gilidáidda lea oassi Kárášjoga Geassesajit-festívála, mii lágiduvvo vuosttas háve.
Festivála álggii suoidnemánu vuosttas beaivve ja bistá gitta viđát beaivve rádjai.
Okta temá lea Kárášjohka 150 jagi.
Vuossárgga, 4.7.2016 prográmmas leat earret eará diibmu 11–13 Norgga áigge vázzintuvra Beassi-kulturstašuvnnas Oalgevárrái, diibmu 14–15 gilidáidaga rahpan, diibmu 15–17 ságastallan Kárášjoga geassesajiin girjjálašvuođas ovttas Káráš Ingrid Granrudain ja Inga Ravna Eirain ja diibmu 18–20 vejolašvuohta oahppat sámegiela Bivddus.
Maŋŋebárgga 5.7.2016 prográmmas leat earret eará diibmu 11–13 Norgga áigge vázzintuvra Beassi-kulturstašuvnnas Oalgevárrái, diibmu 15–17 dáidda- ja kulturvázzin Kárášjoga guovddážis, diibmu 18–20 vejolašvuohta oahppat sámegiela Bivddus ja diibmu 21 nuvttá Eva J. Ivertsena konsearta Bivddus. Konsearttas maid divttat, juoigat ja kåseriijat.
Lassedieđut siiddus beassi.org.