Anáris Áŋŋelgeainnu mielde johtet máŋgasat beaivválaččat Anárii bargui, buvdii dahje skuvlii. Geaidnu lea goit stuorámus oasil čievrageaidnu ja giđđat dan ortnet lea molsašuddi.

Irene Länsman vuodjá geainnu masá beaivválaččat Anárii bargui. Bargomátki čievrageainnu mielde láve sus bistit guokte diimmu. Länsman ii leat ovdal oaidnán geainnu ná heajos ortnegis.

– Dat lea dego bassanreahtta, olles áigge doarggista dat biila.

Nubbin hástalussan lea geainnu ala boahtti láirágeardi, mii lea njuoskkasin hui njaláhas.

– Iskat mannat ovddosguvlui ja de fáhkkestaga leatge mannamen doaresbeallai, muitala Länsman.

Maiddái Pirjo Valikainen johtá geainnu mielde masá beaivválaččat. Son vuojiha táksiin skuvlalaččaid skuvlii ja ruoktut. Valikainen muitala, ahte juohke giđa geainnu alde leat hástalusat go giđđabeaivváš dibmegoahtá dan.

– Hástaleaddji go geaidnu lea oasil vel jieŋas ja lea jiekŋagurat ja beaivit de suddá ja šaddá stánžžas, muitala Valikainen.

Skuvlasáhtuid maksimálaguhkkodagat leat lágas dárkket meroštallojuvvon. Vuođđooahpahuslága mielde vuolleskuvlla oahppi skuvlamátkkit ožžot oktan vuordimiin bistit eanemustá guokte ja bealle diimmu ja badjeskuvlla oahppiin golbma diimmu.

Geainnu heajos ortnegis ja guhkes mátkkiin fuolakeahttá leat dál vel nagodandoallat skuvlamátkkiid áiddo daid rájáid siste. Skuvllasáhtuid vuorddašeapmái ii goittot leat áigi.

– Juos oktage oahppi beassá skuvllas, de su galgá dalán vuolgit doalvut ruoktot, muitala Valikainen.

Árra giđđa dagaha hástalusaid

Giđđa lea dán dálvve ollen árrat ja čeavrageainnuin lea siivvuhisvuohta. Deaddoráddjehusaid leat bidjan Soađegili ja Gihttela guvlui, Anáris dasa ii leat leamašan dárbu. Stuorra ja lossa vuojánat lasihit geainnu ráiggiid šaddama. Eallinfápmoguovddáža geaidnofuolahusa prošeaktahoavda Juha Loukusa muitala, ahte sii leat álgán deaddoráddjehusaid bidjat geainnuide mannan vahkus.

Áŋŋelgeaidnu lea maiddái eallinfápmoguovddážis dárkilis čuovvuma vuolde ja dohko vuojihit siivvuhisvuođa várás oaivvilduvvon luovosčievrra ain dárbbu mielde.

– Go geainnut goiket de beassat álggahit giđđadivvumiid albma láhkai, muitala Loukusa.

Heajos geaidnu gáibida buorre biilla

Áŋŋelgeainnu alde ii ábut šimahit juos háliida biilla seastit. Fiidnát vuojedettiinge biillat eai álo gierdda rokkiid ja heajos geainnu. Länsman biilii leat ihtán váivves váttut biilla njuikkodettiin geainnu mielde. Fáhkkestaga sáhttet mannat ala beaŋkkaliggemat, rádio, lohkat dahje njeallje juvlla geassin.

– Dat dagaha dakkár ártegis ipmašiid. Bođii dego robohtta dan biillas, čaimmiha Länsman.

Maiddái Valikainen lea fuolas eandalit biilla rieggáin, mat deivet rokkiide.

– Dieđán ahte ain juo okta riekkis lea bieđganan Áŋŋelgeainnu alde.

Heajos geainnus sáhttá álmmuhit geaidnogeavaheaddjilinjái

Eallinfápmoguovddáš oažžu dieđu geainnuid váilevuođain álkimusat geainnu mielde vuoddji olbmuid almmuhusaid bokte.

Länsman ii leat álmmuhan Áŋŋelgeainnu dilis.

– Mun lean ieš válljen ássat doppe doares bealde ja dieđán makkár dat geaidnu lea, de dan dihtii in leat álmmuhan.

Loukusa muitala, ahte dán giđa lea boahtán dušše okta álmmuhus Áŋŋelgeainnu ortnegis. Son goittot ávžžuha earáidge dieđihit johtolaga áššehasbálvalussii dahje riŋget geaidnogeavaheaddji linjái 02002100, juos geainnus leat váilevuođat.

– Dalle dieđut mannet jođánepmosit hukseheaddjái ja sii besset dalán álgit doaimmaide, muitala Loukusa.