Ohcejoga márkanis lei maŋŋebargga 12.5. hušša go eiseválddit ja eaktodáhtolaččat hárjehalle, mo doaibmat jus stuorra johtolatlihkohisvuohta dáhpáhuvva. Eiseválddiiide hárjehallan lea dehálaš.

– Buot deháleamos lea hárjehallat ovttasdoaibmama, ahte go dat duođalaš bárti geavvá, de buohkat dihtet mo galgá doaibmat. Dánge hárjehusas leat mielde iešguđet doaibmit nu eiseváldit go eaktodáhtolaččatge, dadjá gearggusvuođahoavda Tanja Sävelä Suoma Rukses Ruossas.

Ohcejogas leat guhkes gaskkat eaige buot eiseválddit leat álot guovllus. Hárjehusas lei dihto láhkai niehkodilli go ollu resurssat ledje geavaheamis ja veahkki bođii jođánit.

Duohtavuohta lea olu vearrát muittuha čáskadanhoavda Mika Aikio Ohcejoga eaktodáhtolaš čáskadangottis.

– Hárve leat ná olu olbmot, geat leat veahkkeheamen. Juos mis leat vihtta olbmo fárus ja boahtá ambulanssi ja doppe leat guokte olbmo ja daiguin galgá birget diimmuge. Das lea oalle hommá.

Ohcejogas leat olu eaktodáhtolaččat gádjunveagas. Danin maiddái gildii lea dehálaš hárjehallat dili.

Gielddahoavda Päivi Kontio mielas lea erenomáš dehálaš eandalii danin go buresveadjinguovloođastusa maŋŋá su oainnu mielde lea báhcán eahpečielggasin mo ovddasvástadusat juohkásit.

– Mii sáhttit dás seammás čielggasmahttit gieldda rolla ja siskkáldas doaimma, go leat olu eahtodáhtolaččat oassálastimin lihkohisvuohtadiliide.

Kontio lei sávvat, ahte maiddái Norgga beale gádjunlágádus livčče lean hárjehusas mielde.

– Duođalaš dáhpáhusas doppe vejolaččat boahtá gádjunjoavku, de livčče buorre jus siige livččejit dáppe hárjehallamin.