Lescar^[1] (en francés tanplan com en occitan) qu'ei ua comuna bearnesa administrada peu departament deus Pirenèus Atlantics e la region de Navèra Aquitània, ancianament d'Aquitània.

Lo son nom antic de Beneharnum que balhè lo son nom au país de Bearn. Iluro (uei Auloron) e Beneharnum qu'èran los dus ancians evescats de Bearn (uei devath la jurisdiccion de l'evesque de Baiona). La glèisa de Lescar qu'ei donc ua catedrau; qu'ei lo lòc on repausan los Reis de Navarra.

La prononciacion qu'ei [les'ka]. Las fòrmas ancianas que son Beneharnum/Benearnum, en latin (Itinerari d'Antonin), Civitas Benarnensium, en latin, Banarna/Benarnum (Gregòri de Tors), Lascurris en 980, Laschurris en 1128, Alescar en 1170, Laschar au sègle XIIau, Lascaa au sègle XIIIau, Lascurcensis, en latin, en 1289, Lascurrensis, en latin, en 1313, Lascar en 1394, Lesca en 1538, Lasca en 1538, Lescar (mapa de Cassini, a la fin deu sègle XVIIIau). N.B. L'identificacion de Lescar dab l'antica Beneharnum qu'ei generaument admesa, mès pas unanimament ^[2].

Segon Dauzat, Beneharnum qu'ei un nom ibèr; Lescar qu'ei un nom preceltic, a arreligar dab l'espanhòu lasca, «pèira plata», dab un sufixe prelatin -ur o lo basco -uri, «aiga» ^[3].

Segon Miquèu Grosclaude, que cau partir de la fòrma mei anciana lascur. La prumèra sillaba qu'ei a arreligar dab Lascun en Vath d'Aspa, qui vien benlhèu deu basco Lats, «arriu». la segonda sillaba que sembla lo basco gorri, «arroi, sec». Lo nom que seré d'origina aquitana. Lo sens globau que seré de «arriu arroi». Mès on ei aqueth arriu arroi? qu'ei lo medish problèma que per Rivarroi ^[2]. N.B. Lo sens d'«arriu sec» qu'ei mei probable (un arriu irregular, qu'a d'aiga sonque quan plau), benlhèu per Lescourre (deu latin excurrere), citat per M. Grosclaude.

Lescar, en purmèr, que ho un oppidum nomat Beneharnum. Au sègle III que vadó ciutat romana. Los vikings que la destrusín tota sancera en 841. Au sègle XII la ciutat modèrna de Lescar que ho tornada bastir. L'evesque de Lescar que presideish los Estats de Bearn e la catedrala (ua de las duas catedraus bearnesas dab Auloron Senta Maria) qu'acèssa lo tombèu deus Reis de Navarra de la soca deus Labrit.

Uei lo dia qu'ei ua banlega de Pau, sièti de la zòna industrau e comerciau.

• En 2019 la populacion qu'èra de 9665 abitants.

Lescar qu'acessa ua escòla calandreta.

• La catedrau de Lescar qu'ei ua de las duas catedraus de Bearn, tombèu deus Reis de Navarra de l'Ostau de Labrit.

• Comunas deus Pirenèus Atlantics

1. ↑ Sit Toponimia occitana
2. 1 2 Michel Grosclaude, Dictionnaire toponymique des communes du Béarn, Escòla Gaston Febus, 1991, p. 181
3. ↑ Albert Dauzat, Charles Rostaing, Dictionnaire étymologique des Noms de Lieux en France, Librairie Guénégaud, reedicion 1984, p. 396

• 👁 Portau de Bearn
  Portau de Bearn