Seuvalada^[1] (Sauvelade en francés) qu'ei ua comuna bearnesa, pròcha d'Ortès e site d'ua abadiá, administrada peu departament deus Pirenèus Atlantics e la region de Navèra Aquitània, ancianament d'Aquitània.

L'abadiá de Seuvalada que ho fondada lo 6 d'abriu de 1128 per Gaston IV lo crotzat abans que partisse en crotzada en Espanha. Que la con·hidè a l'ordi deus benedictins lo son terrenh aperat Sylva Lata en latin. Los monges que s'encarguèn d'arcuélher los romieus.

En 1286 l'abadia que passè devath l'obediéncia Cisterciana.

Que ho destrusida en 1569 peus huganauts e tornada bastir per la Contrarefòrma en 1630. Venuda per la Revolucion Francesa, qu'èra en estat de roeinas chic a abans que la comuna la crompesse per la restaurar.

La prononciacion qu'ei [,sewbə'ladə]. Las fòrmas ancianas que son Sylva lata, en latin, en 1127, Silvalata, en latin, en 1178, Selvalada en 1290, Seubalade en 1343, Ceubalade, Saubalade en 1536 e 1644, Sauvelade (mapa de Cassini, a la fin deu sègle XVIIIau) ^[2].

Segon Dauzat, lo nom que vien de silva, «ahorèst, seuva» e lata, «larga» ^[3].

Segon Miquèu Grosclaude, abans la formacion deu vilatge, la seuva èra aperada Faget. Lo nom pausa pas cap problèma e lo sens qu'ei lo d'«ahorèst espandida» ^[2]. La prononciacion [-ew] de la prumèra sillaba que s'ei conservada pr'amor lo nom qu'ei demorat compausat e i a un accent segondari sus la sillaba iniciau. En francés, l'atraccion deus nom de tipe Sauvetat e deu vèrbe sauver, «sauvar» qu'a modificat lo vocalisme.

• En 2019 la populacion qu'èra de 265 abitants.

Sit oficial

1. ↑ Toponimia Occitana (Institut d'Estudis Occitans): IEO_BdTopoc: http://bdtopoc.org
2. 1 2 Michel Grosclaude, Dictionnaire toponymique des communes du Béarn, Escòla Gaston Febus, 1991, p. 133
3. ↑ Albert Dauzat, Charles Rostaing, Dictionnaire étymologique des Noms de Lieux en France, Librairie Guénégaud, reedicion 1984, p. 651, a La Selve

• 👁 Portau de Bearn
  Portau de Bearn