Saint-Brieuc (bretainieraz:Sant-Brieg) Bretainiako kostaldearen ipar-erdialdean dagoen hiria eta Côtes-d'Armor departamenduko hiriburua da, bai eta Bro Sant Brieg lurralde historikoarena ere.

45.879 biztanle zituen 2008an. Frantsesaz gain, bretainieraz eta galoz ere mintzatzen dira.

Izen bereko badiatik hurbil dago, itsasotik 3km-ra.

Hiritik hurbil dago portua (Port du Légué). Turismoa (hondartzak), nekazaritza eta arrantza produktuen merkataritza eta industria (metalurgia, janari industria, ontziola txikiak, ehungintza, nekazaritzako makineria) dira ekonomia jarduera nagusiak.

Saint-Brieuc herria galiar fraide batek 480 urtearen inguruan sortu zuen monasterio baten inguruan hazi zen. 1220an apezpikuaren egoitza bihurtu zen eta Guillaume Pinchon apezpikuak katedrala eraiki zuen XIII mendean. 1355ean sute handi batek hiria suntsitu zuen, bai eta katedralaren koroa ere. Berreraikitzean katedral-gotorleku itxura hartu zuen, hiriak jasaten zituen eraso ugarietan herritarren babesa hartu zezaten.

Arturo II.a Bretainiako Dukeak Bro Sant Brieg edo Penteur lurralde historikoa eratu zuen Saint-Brieuc hiriaren inguruan.

Aipagarriak dira XIV-XV. mendeetako Saint-Étienne katedrala (XVIII. mendean berritua), apezpikutegia eta etxe zaharrak.

• Zénaïde Fleuriot (1829-1890), idazlea.
• Francisque Habasque (1842-1917), historialaria.
• Célestin Bouglé (1870-1940), filosofo eta soziologoa.
• Patrick Dewaere (1947-1982), aktorea.
• Anthony Morin (1955-), txirrindularia.
• Alicia Toublanc (1996-), eskubaloi jokalaria.

• 👁 Saint-Brieucen mapa
  
  Saint-Brieucen mapa
• 👁 Udaletxea
  
  Udaletxea
• 👁 Justizia-jauregia
  
  Justizia-jauregia
• 👁 Port du Léguétik igarotzen den biaduktua
  
  Port du Léguétik igarotzen den biaduktua

• (Frantsesez)(Bretainieraz) Webgune elebiduna
• (Frantsesez) Webgune ofiziala